A princesa e os trasgos

Coprodución entre Hungría, O Reino Unido e O Xapón. A versión orixinal do filme foi producida de xeito simultáneo en húngaro e en inglés, con prioridade no guión en inglés para o mercado internacional. O guionista e produtor principal, Robin Lyons escribiu a historia en inglés adaptando o libro escocés. A gravación das voces en inglés fíxose antes de rematar o proceso de animación para que os debuxantes puidesen cadrar os movementos das bocas dos personaxes ('lip-sync'), un estándar habitualmente baseado na pista de son inglesa neste tipo de coproducións occidentais. Porén, comercialmente, a versión en húngaro estreouse primeiro nos cines (Hungría, 20/12/1991), mentres que a versión en inglés non chegou ás salas do Reino Unido ata un ano despois (18/12/1992). A estrea cinematográfica en España produciuse anos máis tarde (16/07/1997) cunha dobraxe ao castelán feita en Galicia na que participaron algúns actores (Paco Barreiro, Xoán Diéguez, Manuel Pombal) que un lustro despois participarían con outros papeis na versión en galego.